Freiburger historische Bestände - digital

Prospekt vom 11. November 1783

185

candide nobis aperiant, ac nostra etiam, si videbitur, corrigant, demant
superflua, necessaria addant, ut lioc modo perfectus ac pluriam erudi-
torum judicio exactus et probatus totius operis conspectus in publicum
prodire quam primum valeat In hoc simul conspectu sistetur exacta
limitum Germaniae sacrae determinatio, provinciarum quoque, episco-
patuum ac monasteriorum designatio, sive supersint adhuc, aut iam quo-
cumque fato interciderint. Interim vero nos intra consuetos Imperii
Germanici circulos continemus, adnumeratis tarnen simul regno Arela-
tensi, Burgundia, Helvetia, Belgio, Lotharingia, et Alsatia. Confinia
quoque Italiae, Galliae, Hungariae, Poloniae, quin et Daniae ac Sueciae,
in Ulis praecipue epochis, queis nexu quodam cum Germania nostra
iuncta fuere illa regna, in censum nostrum venient.

XVII, Tomum primum auspicabimur a Metropoli Moguntina totius
Germaniae praecipua et antiquissima, cuius quidem historicam descrip-
tionem adornavit jam Reverendissimus Würdtwein, suffraganeus
nunc Wormatiensis, sua in operas nostras studia pollicitus et praeci-
puus societatis hujus promotor. Hunc imitatus illustrissimus L. B.
de Zurlauben, aliunde orbi litterato notissimus, totam nobis diplo-
matum suorum MSS. collectionem a se factam, et ultra 300 volumina
constituentem humanissime nobis eam in rem condixit. Ante omnes
vero memorandus Illustriss. Comes Garampius, Pontificius apud
nos aulam Caesaream Legatus, qui amplissimam suam pro ,,Orbe chri-
stiano" factam collectionem omnemque operam polliceri est dignatus
Subsequentur dioecesis eidem metropoli vel olim vel etiamnum suffra-
ganeae, scilicet Augustana, Argentoratensis, Constantiensis, Curiensis,
Spirensis, Wormatiensis, Eichstadensis, Wirzeburgensis, Paderbornen-
sis, Hildesiensis, Verdenensis, Halberstadiensis, Bambergensis ac nuper
Fuldensis, quin et Pragensis, antequam ab hac metropoli exemta in
propriam excreverit. Quae adeo dioeceses cum contentis in iis mona-
steriis etc. primo loco concinnandae venient.

Neque vero nos tarn iniquos rerum arbitros existimabit quisquam,
qui nobis solis hunc adornandae Germaniae sacrae honorem vindice-
mus. Omnino enim Maurianorum morem in eo imitabimur, ut omnium,
qui singulares titulos elucubrarint aut praecipua in eos subsidia libera-
liter contulerint, pretiosa nomina in cuiusque sive tituli sive tomi
fronte simus expressuri.

Huic itaque instituto Patriae nostrae tarn honorifico quam utili ut
symbolas suas confere nobiscum velint Germaniae nostrae Eruditi,
quod nobis polliciti jam sunt exteri quam plurimi, interque eos sodales
quoque Mauriani in Gallia, impense admodum rogamus.

Scribebamus e Musaeo nostro D. Blasii in Silva Nigra ad d. XI.
Nov. a. r. s. 1783.

Societatis nomine
P. Aemilianus Ussermann
Bibliothecarius.