Freiburger historische Bestände - digital

Otto Werner

sonndern anhanng, Souerr Er Karle schweickhart sollich silber vnnd Golld in dem Anschlag
wider begerte an sich zulesen in monats frisst, das solle sie Ime zuanntwurten schuldig sein. Auff
sollichs bleibt Er Karle Ir noch Per Rest Zwayhundert vnnd zwaintzig guldin, daran soll sie
annemen gewisse schulden, die von Jar zu Jar vnnd von Zill zu ZillJärlich gefallen. Dergestallt,
dieweil es nit bar gellt oder zu barem gellt nit gemacht werden kan annderst dann mit verlurst,
das alsdann Sie solliche schulden, wölche sie daraus erwöllen vnnd annemen würdet, das Ir
dieselbigen durch die Ober Amptleut oder das Stattgericht zu Hechingen geschetzt vnnd
verwerdet werden sollen, dermassen, was Ir allso darfur gesprochen wirdet, Darbey soll Sy on
alles mittel bleiben, bis sie vmb die Zwayhundert vnnd zwaintzig guldin vergniegt vnnd
zufriden gemacht worden ist. Vnnd wann Ir also das alles, Inmassen wie vorlaut, eingeanntwurt
vnnd deß hebig gemacht worden ist, So soll sie alsdann für die Taussent Vierhundert vnnd
zwaintzig guldin Damit genntzlich entricht, bezallt vnnd zufriden sein. Vnnd neben völliger
entrichtung vnnd vergnuegunng obgemellter summa gellts, so soll auch gedachter Carle
schweickhart seiner gewesnen Hausfrawen, Henlin Judin, verfollgen vnnd zusteen Lassen alle
Ire Klaineter vnnd was Ir auff her Hochzeit gaubt worden, dieweil sy ain Junckhfraw vnnd Er
ain wittwer gewesen, so Ir sonnderlich zugehörig nach Judischer Ordnung, sampt Irervermehell-
ten girtl vnnd Ring vnnd was Ir von Irem vatter vnnd Anndern Freunnden zu Irem Leib
geschennckht worden, das alles Ir one mittel auch zusteen soll, Nachuollgender massen. Erstlich
ain girttel, wöllche Ir vatter zu Irem Heyratgutt Ir geben, vmb Achtzig guldin, ist nit
vorhannden. Mer ain girtl, damit sy nach Judischem gebrauch vermähellt worden, vmb Sechßig
guldin, so auch nit verhannden. Item Zwaintzig guldin am barem gellt, wöllche Ir auff der
Hochzeit gaubt worden seind, darumb sy ain stuckh golld, ain Portugaleser genannt, gewechselt,
das auch nit verhannden. Dise yetzgemelte drew stuckh, die zwu girtlen vnnd den Portugaleser,
so nit verhannden, die soll ermellter Carle schweickhart seiner gewesnen Hausfrawen von der
Zeit an, alls sie das Ir erfordern wirt, in vierzehen tagen den nechsten darnach, one alles mittel Ir
zuwegen zepringen schuldig sein. Item Iren Mehel Ring, wöllcher Neun Ducaten wigt, vnnd
dann ain Nacht Ring vmb vier Cronen, wöllche auch nit verhannden, für dieselbige zwen Ring
soll Ir verfollgen ain Portugaleser, so Zehen Ducaten wigt, vnnd dann ain Doppel ducaten, so in
dem trichlin in der Cantzlej zu Hechingen zubefinnden sein wirt. Damit soll Sy für die zwen
Ring vergnuegt sein. Weitter die Ainvnndzwaintzig Guldin Ring, wöllche Ir vff der Hochzeit
gaubt worden seind, derselben Zwaintzig Ring werden in dem obgemelten trichlin in der
Cantzlej zu Hechingen auch zubefinden sein, vnnd dann noch ain Ring mit ainem Jachzingkh
beyhannden dess Stattschreibers daselbst seeliger Pfleger zubekomen. Mer Ire silberr gesperr,
Auch silber vnnd zum thail vbergullte Knöpf, die Ir vatter Ir an die klaidung gemacht, So auch in
obgemeltem schrein in ainem Liderin seckhel zufinden sein werden. Souerr auch schlayr oder
sonnst anndere Klaidung, zu Irem Leib gehörig, in obuermelltem Truchlin befunden werden
möchte, deß soll sy auch fähig sein vnnd zugestellt werden. Vnnd dann Dritthalben vntz golld,
auch in disem Truchlin, so Ir Nathan Jud geschennckht, soll Ir auch zugehörig sein. Vnnd nach
sollichem allem, so haben bald obgemelten Partheyen sich selbs gegenainannder frey guttwillig
begeben, verhaissen, zugesagt vnnd versprochen vermag Judischer Ordnung, daß sie sich
vonainannder schaiden Lassen sollen vnnd wällen, Doch mit dem sonndern anhanng, daß Ime
Karle schweickhart die drew Orth, Alls benanntlichen: Zu wormbs, Frannckhfurt oder Pfreim,
deren ort aim, wa es Ime gefällig vnnd gelegenlich sein würdet, sich schaiden zulassen,
daselbsthin Sie Ime nachzuraißen schuldig, vnnd nach Judischem gebrauch sie sich vonainannder
schaiden Lassen sollen in Monats frisst, nachdem sie vmb alles das, wie hieuor geschriben
steet, aller dings genntzlich entricht, bezallt vnnd zufriden gemacht worden ist. Wa aber die
obgemelte Henlin Judin, gedachtz Carle schweickharts gewesne hausfraw, hierynnen ainichen
mangel haben wurde, souil obgeschribner Vertrag mit sich bringt vnnd zuerkennen gipt, was
gestallt das were, vnnd sy darumben bis an Ir völlig benuegen nit bezallt oder genntzlich
zufriden gemacht wurde, Darumb hatt sy gedachter Carle schweickhart vor vnns Stattaman,
Burgermaister vnnd Rath alls tädings Leuten bey seinen waren trewen an Aidsstatt sonnderlich

46