Freiburger historische Bestände - digital

Eine katholisch-jüdische Ehe in Hechingen im 16. Jahrhundert

verpflicht, zugesagt, verhaissen vnnd versprochen, wann vnd so balld die gedachte Henlin Jüdin,
sein Carle schweickharts gewesne Hausfraw, Ine darumben ersuchen vnnd ermanen Lassen
wurde, So soll Er schuldig vnnd verbunden sein, sich alher gen Gintzburg wider zustellen, so
Lanng vnnd vil, bis Sy vmb allen mangel zu Irem benuegen genntzlich entricht, bezallt vnnd
aller dings onclagbar gemacht worden ist. Vnnd wann sy allso vmb alles das Ihenig, so diser
vertrag mit brinngt, versichert, habhafft vnnd onclag gemacht worden ist, Alsdann so soll Er
Carle schweickhart weder von Ir, seiner gewesnen Hausfrawen, noch yemanndts von Irentwe-
gen gegen seinem gnedigen Herrn noch gegen anndern Herrn verrer nit mer veronglimpffet,
verclagt noch verklainert werden. Sonnder sollen sy zubaiden thailen aller her gehapter Spruche,
vordrungen vnnd sacken vnnd was sich darunder mit wortten oder werck verloffen vnnd
begeben hatt, nichtz ausgenomen, gegen ainannder auff ain Ennd genntzlich geahnt, gericht,
geschlicht, versänt vnnd vertragen Haissen vnnd sein, vnnd auch Allso demhalben ainannder
darumben hinfuro nit mer anfechten, hekumbern, vmbziehen noch anlanngen, weder mit noch
one Recht, gaistlichen noch weltlichen, in dhain weiß noch weg. Alls vnnd wie sy dann das alles,
was hieran geschriben steet, vestigelich zuhallten vnnd dem getrewlichen Zugeleben vnnd
Nachzukomen bey Irem Hanndgebenden trewen an Aydsstatt gelobt, zugesagt vnnd versprochen
haben. Wöllches Vertrags baidtail Brieff vnnd Sigl erforderten, die wir Inen zugeben
bewilligt. Vnnd dess zu warem vrkhund, So haben wir, Burgermaister vnnd Rath, gemainer
Statt Guntzburg aigen Secret Innsigl, Doch vnns, vnnserm Nachkomen vnnd gemainer Statt in
Allweg onuorgriffen vnnd one schaden, offennlich furgetruckht zu Ennd diß brieffs. Der geben
Ist auff den Letsten tag dess Monats Apprillis Im Funffzehenhundert Sechsvnndsechßigisten
Jarrs. (Papiersiegel)

Lagerort der beiden Quellen: StAS, Hol CII 7b Nr.6.

47